Հիշված լինելու արվեստը․ հարցազրույց Աննա Սալոմեի հետ անձնական բրենդինգի թեմայով

Այսօրվա իրականության մեջ անհատականություն մնալն ու հստակ երևույթների հետ ասոցացվելը դարձել է մարտահրավեր և աշխատաշուկայում, կյանքում կայանալու համար անհրաժեշտ է ճանաչել ինքդ քեզ, ճիշտ դիրքավորվել ասպարեզում և ընդգծել քո յուրահատկությունները։ Իսկ, թե ինչպես իրականացնել այդ ամենը և ունենալ անձնական բրենդ կպատմի մարքեթոլոգ Աննա Սալոմեն, որն իր կարիերայի ընթացքում ունեցել է 30 անձանց հետ հաջողված անձնական բրենդինգի օրինակներ։  

–Ի՞նչ է իրենից ենթադրում անձնական բրենդինգն ու անձնական բրենդ եզրույթը։

–Նախ սահմանենք՝ ինչ է բրենդինգը․ մարքեթինգում մենք նշում ենք, որ բրենդինգն ապրանքանիշն է, որը մարդկանց մոտ առաջացնում է որոշակի ասոցիացիաներ և ամենևին էական չէ, թե ինչ ասոցիացիաներ են, դրական, թե՝ բացասական։ Եթե մենք Nike ասելիս հստակ պատկերացնում ենք ապրանքատեսականին, էներգիան, հիշում ենք որոշակի գովազդներ և ասոցացնում որոշակի կերպարի հետ, ապա վստահաբար կարող ենք ասել, որ սա հենց այդ դասական բրենդինգի օրինակն է։ Նույն տրամաբանությունը գործում է անձի դեպքում։

–Խոսենք անձնական բրենդինգի կարևորության մասին, այսօ՞ր որքանով է անձնական բրենդը կարևոր։

–Անձնական բրենդինգի դերը և կշիռն ուռճացված չեն և սա ժամանակի թելադրանք է, որն այլ կերպ չէր կարող լինել։ Եթե խոսում ենք այսօրվա իրականությունից ակնհայտ է, որ շուկան այսօր գերմրցակցային է, տեղեկության հոսքը շատ է և հաճախ անձը բախվում է խնդրի, թե ինչպես տարբերվել, ինչպես դիրքավորվել, ներկայանալ և ընկալված լինել, իսկ դա միայն հնարավոր է անձնական բրենդինգի շնորհիվ։

–Ո՞ւմ է անհրաժեշտ անձնական բրենդինգը, արդյո՞ք կարող ենք ասել, որ այսօր յուրաքանչյուր ոք ունի անձնական բրենդինգի կարիք։

–Անձնական բրենդինգը կարևոր է այն մարդկանց համար, որոնք ցանկանում են մեծացնել իրենց շահույթն ու եկամուտը, կամ դառնալ հայտնի և ճանաչված։ Կարող եմ ասել, որ այս երկուսը հիմնական շարժառիթներն են, որով գալիս են ինձ մոտ։ Լինում են նաև այլ շարժառիթներ, ռեբրենդինգի դեպքեր, բայց կարող եմ ասել, որ անձնական բրենդինգն անհրաժեշտ է նաև մարդկանց, որոնք չեն ծավալում      հանրային գործունեություն, բայց ցանկանում են կայանալ և դիրքավորվել իրենց ոլորտում։

–Երբ անձը դիմում է ձեզ, որպեսզի իրականացնեք իր անձնական բրենդինգը, ո՞ր կետերից է սկսվում աշխատանքը։

–Առաջին փուլում մենք իրականացնում ենք SWOT վերլուծություն, որն իրենից ենթադրում է անձի ուժեղ և թույլ կողմերի վերլուծություն և դիտարկում սպառնալիքների և մարտահրավերների և ըստ այդ վերլուծության հենց ուժեղ կողմերի վրա հիմնվելով՝ սկսում ենք կառուցել անձնական բրենդինգը։ Հենց նախնական փուլում կարևոր է հասկանալ, թե ինչ նպատակ ունենք մենք և ինչու ենք իրականացնում անձնական բրենդինգ, քանի որ նպատակից և վերջնակետից կախված է ողջ ընթացքն ու ռազմավարությունը։ Նպատակների հստակեցումից հետո ընտրում ենք թիրախային լսարանը, թե ում հետ և ում համար ենք աշխատելու, ով է մեր հիմնական սպառողը։ Կարևոր նախապայման կա, որը ես կիրառում եմ․ մարքեթինգում շատ ավելի կարևոր է լինել առաջինը, քան լավագույնը։ Հենց այստեղ էլ թաքնված է գաղտնիքը, որ պետք է հասկանանք անձի յուրահատկությունը և ինչով է նա տարբերվում մնացյալից։

–Մենք կարողանո՞ւմ ենք դիտարկել ռեբրենդինգը, երբ անձն արդեն իսկ ճանաչված է, բայց ունի նորովի ներկայանալու և դիրքավորվելու կարիք։

–Այո, սա ևս անձնական բրենդինգի մասին է, երբ մենք տեսնում ենք, թե ինչպես է անձը ներկայանում հանրությանը, բայց ժամանակի ընթացքում ստանում լիովին այլ դիրքավորում։ Լավագույն օրինակներից է Քիմ Քարդաշյանը, որը ներկայանում էր արաբական ոճով, հայտնի էր ոչ բարոյական նորմերով և ցածրորակ ժամանցային շոուի միջոցով, բայց այսօր նա ենթարկվել է ռեբրենդինգի և նրա հետ աշխատել է ահռելի թիմ։ Այսօր նա գործարար կին է, որը քարոզում է ընտանեկան արժեքներ, տալիս է երբեմն բարոյախրատական հորդորներ, գալիս Հայաստան, այցելում Ծիծեռնակաբերդ և այպես շարունակ։ Այսօր մենք կարող ենք ասել, որ նա ներկայացել է հանրությանը լիովին սխալ ձևաչափով, բայց այսօր ընկալված և ճանաչված կերպար է։

—Ո՞ր տարրերն են ամենից կարևոր անձնական բրենդինգի պարագայում։

–Կարևոր կետերից է դիրքավորումը, երբ մենք հասկանում ենք, թե ինչպես պետք է անձը դիրքավորվի շուկայում։ Կարևոր է, որ մենք կարողանանք ընդգծել առանձնահատկությունը, որի շրջանակում քո անունն ուղիղ պետք է ասոցացվի առնվազն 3–ից 5 բառի հետ, որոնք լայն և նեղ մասսաների մոտ գրեթե նույնն են։ Շատ կարևոր է իմիջի տարրը, որը պետք է համապատասխանի քո դիրքավորմանը։ Եթե դու նշում ես, որ ամենից թանկ վարձատրվող բիզնես թրեյներն ես, բայց հագնվում ես ոչ համապատասխան հագուստ, ապա դա չի ներշնչում վստահություն։

—Խոսենք մեդիայի և սոցիալական հարթակների կարևորության մասին։ Որքանո՞վ են կարևոր այդ հարթակները։
—Այսօր մենք չենք կարող անտարբեր անցնել մեդիայի և սոցիալական հարթակների կողքով, քանի որ այսօր սոց․ հարթակներն ունեն կարևոր նշանակություն։ Նախ պետք է հասկանալ, թե ինչ ոլորտի ներկայացուցչի հետ ենք աշխատում և որ հարթակն է կիրառելի, այնուամենայնիվ կան դեպքեր, երբ այդ հարթակների ակտիվ կիրառման կարիք չկա։ Սոցիալական հարթակներն ունեն կարևոր առանձնահատկություն՝ հավասարությունը բոլոր օգտատերերի համար, որտեղ դու կարող ես 0–ից բացել էջ, զարգացնել այն, ընտրել թիրախային լսարան և գումար վաստակել, բայց ժամանակին հեռուստացույցով երևալը գումար և հեղինակություն էր պահանջում, որն արդեն կոտրում էր այդ հավասարությունը։  Ես ունեցել եմ դեպք, երբ աշխատել ենք հոգեբան Թամարա Սիմոնյանի հետ, որն այսօր ունի 12 հզր–ից ավել հետևորդ և էջն օրգանիկ աշխատել է և այսօր մենք ունենք հոգեբան, որն օնլայն հարթակով խոսում է տարբեր թեմաների շուրջ և տալիս մասնագիտացված խորհուրդներ։

—Ի՞նչ մարտահրավերների է հնարավոր բախվել անձնական բրենդինգի ստեղծման ճանապարհին։

–Ցավոք սրտի, մարտահրավերները շատ են և կցանկանամ առանձնացնել «ինքնակոչի» համախտանիշը, երբ գրեթե բոլոր գործընկերներս որոշակի ժամանակ անց սկսում են մտածել, որ իրենք ինքնակոչ են, աշխատանքն անիմաստ է և իրենց հաջողությունը պատահական երևույթ է: Ինչպես նշեցի մենք սկզբնական փուլում մարտահրավերներն ու սպառնալիքները ևս դիտարկում ենք, բայց, իհարկե լինում են նաև ֆորսմաժորային իրավիճակներ, որոնք ևս կարողանում ենք հարթել, ի վերջո մենք աշխատում ենք մարդու հետ և հուզական դաշտը, արտաքին գործոնները ևս կարևոր բաղադրիչ են։

—Մենք ապրում ենք փոփոխվող աշխարհում, երբ ամեն օր գալիս է նորը, նոր թրենդը, նորամուծությունը և մի քանի խորհուրդ՝ ինչպե՞ս չկորցնել արդիականությունը։

–Թրենդի մեջ մնալու կարևոր նախապայմանն օրգանիկությունն է, երբ դու հաշտ ես և ընկալելի այդ իրավիճակի հետ, ոչ թե ծիծաղելի։ Կարևոր է նաև այդ թրենդներին զոհ չգնալ, քանի որ սկզբում էլ նշեցի, որ պետք է աշխատել ասոցիացիաների վրա և որոշակի ժամանակ անց ունենալ ձևավորված ընկալում։

—Գիտեմ, որ ունեցել եք բավականին ծավալուն փորձ, բայց կցանկանամ, որ առանձնացնեք մի քանի ստացված համագործակցություն։

–Շատ համագործակցություններ կոնֆիդենցիալ են և հենց աշխատանքի սկզբում մենք հստակեցնում ենք դա, բայց կան նաև դեպքեր, որոնք հանրային են։ Ինչպես նշեցի Թամարա Սիմոնյանի օրինակը, որն այսօր, թե՛ հոգեբանական ասպարեզում, թե՛ մեդիատիրույթում պահանջված մասնագետ է։ Կարևոր օրինակ է Գրիշա Աղախանյանի հետ աշխատանքը, երբ մենք իրականացնում էինք նրա վերադարձը շոուբիզնեսյան ոլորտ և նոր շունչ տալիս իր երգերին, աշխատանքին՝ հասնելով մի փուլի, երբ իր առաջին գործերը դառնում էին հիթային այսօր և լսվում ամեն տեղից։